27. desember 2011 - Sigurður B. Stefánsson

Hlutabréf á Wall Street hækka í vikunni til Þorláksmessu og sama á við í flestum kauphöllum veraldar

Hlutabréf  á Wall Street hækka í vikunni til Þorláksmessu, föstudags 23. desember 2011, og sama á við í flestum kauphöllum veraldar. "Santa Claus Came To Town" glymur við á göngum miðlaranna. Þriðjudagur 20. desember reynist vera staðfestingardagur, 17. dagur eftir snúning þann 28. nóvember sl. Hækkun þann dag er 2 til 3% eftir því hvar mælt er og velta meiri en mánudaginn 19. desember sem er talið til marks um að fagfjárfestar séu á ferðinni. Velta nær þó ekki meðaltali á staðfestingardag. Hugsanlegt er að aukin velta stafi frá víxlurum sem rjúka til og loka skortstöðum þann dag fyrir Santa Claus Rally sem væntanlegt er á hverri stundu.

Mynd 1 Vikukort af DAX í Frankfurt sýnir liðlega þriggja prósenta hækkun í 51. viku og mikla blokk viðnáms við gildin 6000 til 6200.

Þegar litið er á 51. viku alla er velta langt undir meðaltali eins og hefðbundið er í síðustu viku fyrir jól. Í þeim skilningi eru viðskipti ekki eðlileg og ekki með þátttöku ,,Big Money“. Ekki er heldur um að ræða leiðandi sóknargreinar í hækkun og þaðan af síður leiðandi fyrirtæki að skjótast upp úr grunnum. Í Þýskalandi þar sem hlutabréf eru sterkust í Evrópu er lokagildi DAX vísitölunnar 5.879. Við 6.000 er mótstöðublokk og mikla eftirspurn hlutabréfa umfram framboð þarf til að brjótast í gegnum hana. Mynd 1 sýnir vikulegu meðaltölin 13 vikna og 34 vikna með nærri 5% bili á milli þeirra sem breytist lítið.

Mynd 2 Hlutabréf í Bandaríkjunum eru leiðandi og hafa lækkað minna en hlutabréf í Evrópu og í Asíu. Vikukort sýnir að niðurhallandi viðnámslína rofar í 51. viku. Með Santa Claus í 52. viku eru líkur á frekari hækkun – en spurning er hve varanleg hún reynist.

Þegar langtímastefna hlutabréfa snýst til hækkunar eftir langvarandi lækkun frá lokadögum júlí sumarið 2011 verða í fararbroddi leiðandi greinar sem eru sterkari en aðrar á mælum grunngreiningar. Fagfjárfestar flykkjast á markað og skipta skuldabréfum og öðrum eignum í söfnum sínum út fyrir hlutabréf. Mikil aukning í veltu leynir sér ekki. Hækkun vikunnar til 23. desember er ekki af þeim toga, hvorki í Evrópu né í Bandaríkjunum. Hún kann að reynast skammvinn og ekki varanleg.

Santa Claus er nærri árviss á Wall Street og boðar ekki gott ef hann vantar

Santa Claus Rally er bylgja hækkunar sem oftast nær til fimm síðustu viðskiptadaga hvers árs og fyrstu tveggja daga í janúar. Meðalhækkun síðan árið 1969 er 1,6% en 1,5% árlega sé mælt aftur til ársins 1950 (sjá Stock Trader´s Almanac 2011, bls. 110). Þau ár sem hækkun í þessum dúr nær ekki að skila sér er hætta á lækkunarskeiði á nýja árinu eða a.m.k. lækkun þannig að unnt sé að kaupa hlutabréf á lægra verði síðar á því ári. Þeir Hirsch og Hirsch höfundar STA sýndu fram á þessa reglu á Wall Street með tölfræðirannsóknum árið 1972. Hugsanlega er líka runnin undan rifjum þeirra æringjanna hendingin ,,If Santa should fail to call, bears may come to Broad and Wall“.

Aldrei er á vísan að róa þar sem Mr. Market er annars vegar. Niðurstöður þeirra Hirsch og Hirsch byggja á meðaltölum en frávik eru óþægileg í minningunni. Dagkort af S&P 500 á mynd 3 sýnir Santa Claus rallið frá 2004 sem reynist binda endi á margra vikna hækkunarskeið frá síðustu viku október það ár. Á fyrsta viðskiptadegi árið 2005 tekur við lækkun í mikilli veltu og alls lækkar vísitala stórfyrirtækjanna í fyrstu viku ársins um 2,12%.

Mynd 3 Árið 2005 opnaði með snöggri lækkun sem mörgum kom í opna skjöldi eftir hækkunarskeið frá þriðju viku í október 2004.

Mynd 3 sýnir líka hve velta er lítil síðustu viðskiptadaga ársins, rétt eins og í þriðju viku nóvember þegar þakkargjörðarhátíð kallar fjárfesta og víxlara heim frá vinnu. Hún sýnir að nokkur lækkun varð á verði hlutabréfa í janúar árið 2005 en árið í heild skilar liðlega þriggja prósenta hækkun.

Hvað er í stöðunni? Vika 51 skilar góðum ávinningi í kauphöllum um víða veröld

Eftir lækkun í fyrri hluta desember 2011 tekur við hækkun í vikunni til  Þorláksmessu 23. desember. Lækkun er aðeins í Ástralíu, Kína og Japan og hún er léttvæg.

Tafla 1 Næstaftasti dálkur töflunnar sýnir hvernig bilið á milli S&P 500 og margra landavísitalna gleikkar enn síðustu tólf mánuði en það er um eða yfir 20% í 10 tilvikum.

Mesta hækkun er í fáeinum greinum í Bandaríkjunum. Byggingafyrirtæki og fjármál hækka um 5,9% og 4,9% og orkufyrirtæki hækka um 5,2% enda hækkar vísitala olíuverðs um 6,1% í vikunni.  Í þessari viku varð ekki á breyting á gengi evru gagnvart dollara þrátt fyrir hækkun á verði hlutabréfa og hrávöru – enda hækka sóknargreinar minna en varnargreinar.

Mynd 4 Rauðu og grænu línur sýna 50 og 200 daga (10 og 40 vikna) meðaltöl heimsvísitölu. Í glugga neðan við mælir MACD línan prósentumun á milli þeirra sem er 4 til 5% og hefur lítið breytst síðan í byrjun nóvember.

Vikukort á mynd 4 gefur yfirlit um gang heimsvísitölu á árinu 2011. Lággildi í byrjun október táknar snúning og ofan við það myndast annað lággildi hærra um miðjan nóvember. Til að marka snúning á meginstefnu hlutabréfa á heimsmarkaði þarf nýtt hágildi sem er hærra en hágildið í síðari hluta október, ofan við gildið 245. Nú er spurning hvort það nær að myndast áður en kemur til nýs lággildis neðan við gildið 213 (sjá miðjan nóvember 2011) sem framlengir þá núverandi lækkunarskeiði hlutabréfa. Þetta kemur í ljós á fyrstu vikum ársins 2012.

Viðsnúningur á árinu 2012? Fylgjumst vel með fjármálum og byggingafyrirtækjum

Í tæknigreiningu eru forsendar allar unnar með líkindareikningi. Líkur eru á því að snúningur verði á langtímastefnu hlutabréfa á alþjóðlegum markaði á árinu 2012. Jafnframt eru líkur á því að bandaríski húsnæðismarkaðurinn hafi loks jafnað sig á þeim tíma og hlutabréf byggingafyrirtækja taki við sér. Þá er erfitt að sjá fyrir sér nýtt hækkunarskeið hlutabréfa í uppsiglingu án þess að fjármálafyrirtæki verði á ný leiðandi á markaði, a.m.k. einhver hluti þeirra. Mynd 5 er forrannsókn á því hvað í gangi er í þessum greinum í síðari hluta desember 2011.

Mynd 5 Fjármál og byggingagreinar í Bandaríkjunum bornar saman frá lokum mars 2009 við upphaf síðustu uppsveiflu á hlutabréfamarkaði.

Vikukort á mynd 5 sýnir tvo kauphallarsjóði, XHB sem oft er beitt til að lýsa framvindu hlutabréfa fyrirtækja í byggingaiðnaði í Bandaríkjunum (sjá töflu 1), og ITB. John Murphy hjá StockCharts.com hefur nýlega bent á að stærstu fimm fyrirtæki í XHB eru alls ekki byggingafyrirtæki heldur verslunarfyrirtæki á sama sviði. Þau stærstu eru Home Depot, Select Comfort og Pier 1 Imports en hlutabréf þeirra allra hafa hækkað mikið á síðustu vikum. Fyrirtæki í byggingaiðnaði vega aðeins 28% í XHB en hlutur þeirra í ITB er 63% og þar er að finna stærstu byggingafyrirtæki eins og Dr. Horton, Lennar, NVR, Toll Brothers og Pulte.

Á mynd 5 sést vel hve XHB (gula línan) hefur hækkað meira en ITB (bláa línan) jafnvel þótt sá síðarnefndi hafi tekið bærilega við sér síðustu þrjá mánuðina. Í glugga neðan við kortið er MACD (13,34) línan fyrir ITB sem sýnir að 13 vikna meðaltalið er að nálgast að skera 34 vikna meðaltalslínuna eftir að bilið á milli þeirra hafði verið yfir 10% í byrjun október 2011. Það lítur ágætlega út en samt eru byggingafyrirtæki (ITB) langt á eftir bæði fjármálum (rauða línan) og XHB þar sem byggingaverslanir hafa mikið vægi ásamt byggingafyrirtækjum.

Rauða línan á mynd 5 sýnir framvindu hlutabréfa XLF, fjármálageirans í S&P 500. Í glugga ofan við kortið er XLF í hlutfalli við S&P 500 og þar er enginn ánægjulegur árangur sjáanlegur. Hlutfallið hefur lækkað allt frá sumrinu 2009. Frá vormánuðum 2011 hefur hlutfallslegum styrk fjármálafyrirtækja hrakað enn hraðar en áður.

Bráðabirgðaniðurstöður af þessari skjótunnu forkönnun á stöðu fjármála- og byggingagreina í Bandaríkjunum leiða ekki í ljós að þessar greinar séu að skjótast í hóp leiðandi greina á næstu vikum. Mynd af samanburðarstyrk fjármála í glugganum efst sýnir að hlutabréf fjármálafyrirtækja voru leiðandi eftir snúning í mars 2009 þótt þau tapi því leiðtogahlutverki um hálfu ári síðar. Miklar líkur eru á því að fjármál verði leiðandi þegar að næstu uppsveiflu kemur. Það er líklegt að snúningur meginstefnu hlutabréfa verði á árinu 2012 en hugsanlega ekki fyrr en vorið 2013.