Hagsjá

Spáum lækkun stýrivaxta

Hagfræðideild Landsbankans telur að vextir Seðlabankans verði lækkaðir á síðasta vaxtaákvörðunarfundi ársins í næstu viku og að þessi vaxtalækkun verði jafnframt sú síðasta í núverandi vaxtalækkunarferli sem hófst í ágúst á síðasta ári. Verði spá Hagfræðideildar um 0,25 prósentustiga lækkun vaxta að veruleika fara vextir Seðlabankans niður í 4%.

8. desember 2017  |  Hagfræðideild

Samantekt

Við gerum ráð fyrir að peningastefnunefnd ákveði að lækka stýrivexti um 0,25 prósentustig á vaxtaákvörðunarfundi sínum 13. desember næstkomandi og að það verði síðasta vaxtalækkunin í núverandi vaxtalækkunarferli.



Nær öruggt má telja að val nefndarinnar þessu sinni standi milli þess að halda vöxtum óbreyttum eða lækka þá um 0,25 prósentustig. Talsverð óvissa er um hvor ákvörðunin verður ofan á enda hægt að færa sannfærandi rök fyrir hvorutveggja.

Það sem einna helst styður við áframhaldandi vaxtalækkanir er að verðbólga hefur nú verið undir verðbólgumarkmiðinu frá því í febrúar 2014 eða í 46 mánuði samfleytt. Að meðaltali hefur verðbólgan verið 1,75% á tímabilinu eða 0,75 prósentustigum undir verðbólgumarkmiðinu.

Helstu rökin fyrir óbreyttum vöxtum, að okkar mati, er óvissa um ríkisfjármálin í ljósi þess að ný ríkisstjórn hefur tekið við völdum og ekki liggur fyrir fjárlagafrumvarp fyrir næsta ár. Þar sem peningastefnunefndin hefur gert fremur lítið úr þessum óvissuþætti í síðustu fundargerðum sínum teljum við að samanvegið séu örlítið meiri líkur á vaxtalækkun nú en óbreyttum vöxtum.

Á síðasta fundi nefndarinnar var ákveðið að halda vöxtum óbreyttum. Síðan þá hefur það helst gerst að krónan hefur veikst örlítið, verðbólgumæling fyrir nóvember sem sýndi 1,7% ársverðbólgu og birtir hafa verið þjóðhagsreikningar fyrir fyrstu 3 ársfjórðunga ársins sem benda til minni eftirspurnar og framleiðsluspennu en Seðlabankinn spáir fyrir árið í ár. Auk þess hefur verið mynduð ríkisstjórn í landinu.

Lesa Hagsjána í heild

Hagsjá: Spáum lækkun stýrivaxta

Póstlistar

Þú getur fengið reglulegar tilkynningar um nýtt útgáfuefni Landsbankans með því að skrá þig á póstlista. Bankinn gefur út fjölbreytt efni um fjármál, efnahagsmál, eignastýringu og ýmislegt fleira.

Skráðu þig á póstlista

Fyrirvari

Innihald og form þeirra greininga sem birtast hér er unnið af starfsmönnum Hagfræðideildar Landsbankans hf. og byggist á aðgengilegum opinberum upplýsingum á þeim tíma sem þær voru unnar. Mat á þeim upplýsingum endurspeglar skoðanir starfsmanna Hagfræðideildar Landsbankans á þeim degi þegar þær voru dagsettar, en þær geta breyst án fyrirvara

No filter applied

Tengdar greinar