Hagsjá

Vinnumarkaðurinn siglir áfram – en þó hefur hægt eilítið á

Nú í maí var áætlað að rúmlega 209 þúsund manns á aldrinum 16–74 ára hafi að jafnaði verið á vinnumarkaði. Það jafngildir 83,4% atvinnuþátttöku og af þeim voru um 201 þúsund starfandi og rúmlega 8 þúsund án vinnu og í atvinnuleit. Sé litið á 12 mánaða meðaltal jókst atvinnuþátttaka stöðugt frá upphafi ársins 2015 fram til vorsins 2017.

6. júlí 2018  |  Hagfræðideild

Samantekt

Fjöldi starfandi á íslenskum vinnumarkaði hefur aðeins einu sinni mælst jafn mikill en nú í maí eða rúmlega 201 þúsund, fjöldinn var sá sami í júní í fyrra. Sé litið á meðaltal síðustu 12 mánaða hafa tæplega 195 þúsund verið starfandi að meðaltali á síðustu 12 mánuðum. Fjölgun starfandi fólks á vinnumarkaði var nokkuð stöðug fram á mitt síðasta ár sé miðað við 12 mánaða meðaltal. Síðan hefur fjölgun starfsfólks verið hægari. Íbúafjöldi hefur aukist töluvert á síðasta ári og ber að skoða þessar tölur með hliðsjón af því. Samanburður á maí 2017 og 2018 sýnir að vinnuaflið jókst um 6 þúsund manns og hlutfall þess af mannfjölda lækkaði um 1,3 prósentustig. Fjöldi starfandi jókst hins vegar um rúmlega 8 þúsund manns og hlutfall þeirra af mannfjölda lækkaði um 0,3 prósentustig. Þessar tölur benda því til þess að spennan á vinnumarkaði fari minnkandi.


Lesa Hagsjána í heild


Nú í maí var áætlað að rúmlega 209 þúsund manns á aldrinum 16–74 ára hafi að jafnaði verið á vinnumarkaði. Það jafngildir 83,4% atvinnuþátttöku og af þeim voru um 201 þúsund starfandi og rúmlega 8 þúsund án vinnu og í atvinnuleit.

Sé litið á 12 mánaða meðaltal jókst atvinnuþátttaka stöðugt frá upphafi ársins 2015 fram til vorsins 2017. Frá maí í fyrra hefur dregið úr atvinnuþátttöku um 1,7 prósentustig sé miðað við 12 mánaða hlaupandi meðaltal. Á þann mælikvarða er atvinnuþátttaka nú svipuð og var vorið 2015.

Vinnutími var svipaður í maí en mánuðina þar á undan, en var 0,7 stundum styttri en í maí í fyrra. Sé miðað við 12 mánaða meðaltal var vinnutíminn í maí einnig svipaður og mánuðina á undan eftir styttingu sem varð síðastliðið haust. Fjöldi vinnustunda þróast á tiltölulega þröngu bili og hefur staðan verið nokkuð stöðug eftir örlitla styttingu síðastliðið haust.

Eins og áður segir jókst fjöldi starfandi töluvert á milli apríl og maí og sama má segja um meðalvinnutíma þeirra sem voru í starfi. Vinnuaflsnotkun jókst því töluvert á milli mánaða. Þar sem sveiflur í tölum eru töluverðar milli mánaða er erfitt að meta breytingar á vinnuaflsnotkun eftir mánuðum.

Sé litið á breytinguna milli maí 2017 og 2018 er staðan sú að vinnutími styttist um 4,8% á meðan fjöldi starfandi jókst um 4,2%. Það þýðir að vinnuaflsnotkun eða heildarvinnustundum fækkaði um 0,6% milli maímánaða. Sú niðurstaða rímar því nokkuð vel við þá umræðu að hagsveiflan hafi náð hámarki.

Sé litið á 12 mánaða hlaupandi meðaltal hefur atvinnuleysi verið nær óbreytt lengi eftir að það minnkaði stöðugt fram á mitt síðasta ár. Meðalatvinnuleysi síðustu 12 mánaða miðað við mælingar Hagstofunnar var 2,8% í maí og hefur sú tala verið nær óbreytt í eitt ár. Meðalatvinnuleysi síðustu 12 mánaða samkvæmt tölum Vinnumálastofnunar um skráð atvinnuleysi var 2,1% nú í maí, en 2,2% í maí í fyrra. Þar sem Vinnumálastofnun mælir skráð atvinnuleysi, þ.e. þá sem eiga rétt til atvinnuleysisbóta, eru mun minni sveiflur milli mánaða í þeim tölum en í tölum Hagstofunnar.

Lesa Hagsjána í heild

Hagsjá: Vinnumarkaðurinn siglir áfram – en þó hefur hægt eilítið á (PDF)

Póstlistar

Þú getur fengið reglulegar tilkynningar um nýtt útgáfuefni Landsbankans með því að skrá þig á póstlista. Bankinn gefur út fjölbreytt efni um fjármál, efnahagsmál, eignastýringu og ýmislegt fleira.

Skráðu þig á póstlista

Fyrirvari

Innihald og form þeirra greininga sem birtast hér er unnið af starfsmönnum Hagfræðideildar Landsbankans hf. og byggist á aðgengilegum opinberum upplýsingum á þeim tíma sem þær voru unnar. Mat á þeim upplýsingum endurspeglar skoðanir starfsmanna Hagfræðideildar Landsbankans á þeim degi þegar þær voru dagsettar, en þær geta breyst án fyrirvara

No filter applied

Tengdar greinar