Hagsjá

Mesti fjöldi fasteignaviðskipta síðan 2007

Í október var 950 kaupsamningum um íbúðarhúsnæði þinglýst á höfuðborgarsvæðinu og hafa viðskipti í stökum mánuði ekki verið fleiri síðan í júní 2007. Aukin sala á dýrari svæðum gæti leitt til hækkunar á vísitölu íbúðaverðs.

19. nóvember 2019  |  Hagfræðideild

Samantekt

Samkvæmt upplýsingum Þjóðskrár voru veruleg umskipti á fasteignamarkaði höfuðborgarsvæðisins í október hvað fjölda viðskipta varðar. Alls var 950 kaupsamningum þinglýst sem er 60% fleiri en í október fyrir ári síðan. Gögn Þjóðskrár benda til þess að viðskipti í stökum mánuði hafa ekki verið fleiri síðan í júní 2007.

Mikil viðskipti í september og svo metfjöldi nú í október hafa lyft meðaltali ársins 2019 talsvert upp. Ef þessi þróun heldur áfram er nokkuð ljóst að ekki sé lengur hægt að tala um að lægð sé yfir íbúðamarkaði.




Seldar íbúðir í október voru fleiri í öllum sveitarfélögum höfuðborgarsvæðisins en í október í fyrra. Hlutfallslega var aukningin mest í Garðabæ en þar var 85 kaupsamningum þinglýst í október, sem er 124% aukning frá því í október í fyrra, þegar 38 íbúðir seldust. Í Garðabæ er hærra ferðmetraverð en annars staðar á höfuðborgarsvæðinu og gæti hlutfallslega mikil sala þar gert það að verkum að meiri hækkun sjáist á vísitölu íbúðaverðs en ella.

Síðustu mánuði hefur fasteignamarkaður á höfuðborgarsvæðinu verið afar rólegur og verðhækkanir verið lágar. Kaupmáttur launa hefur hækkað meira en raunverð íbúða og aðstæður til húsnæðiskaupa eru því almennt nokkuð góðar. Það kemur því ekki á óvart að sjá fasteignamarkaðinn taka við sér, þó tölur októbermánaðar bendi til þess að aukningin sé meiri en búast mátti við. Það er óvíst hvaða áhrif þetta hefur á verðþróun næstu mánaða, en aukin sala almennt bendir til þess að spenna sé að aukast sem að óbreyttu veldur þrýstingi á verðlag og gætu hækkanir því orðið meiri á næstu mánuðum.

Lesa Hagsjána í heild

Hagsjá: Mesti fjöldi fasteignaviðskipta síðan 2007 (PDF)

Póstlistar

Þú getur fengið reglulegar tilkynningar um nýtt útgáfuefni Landsbankans með því að skrá þig á póstlista. Bankinn gefur út fjölbreytt efni um fjármál, efnahagsmál, eignastýringu og ýmislegt fleira.

Skráðu þig á póstlista

Fyrirvari

Innihald og form þeirra greininga sem birtast hér er unnið af starfsmönnum Hagfræðideildar Landsbankans hf. og byggist á aðgengilegum opinberum upplýsingum á þeim tíma sem þær voru unnar. Mat á þeim upplýsingum endurspeglar skoðanir starfsmanna Hagfræðideildar Landsbankans á þeim degi þegar þær voru dagsettar, en þær geta breyst án fyrirvara.

5850a07c-403d-11e5-af9c-0050568800ef

No filter applied

Tengdar greinar