Hagsjá

Kaupsamningum á höfuðborgarsvæðinu fækkar en fjölgar víða annars staðar

Í júní var 355 kaupsamningum vegna íbúðarhúsnæðis þinglýst á höfuðborgarsvæðinu, sem er talsverð fækkun frá því í júní fyrir ári síðan þegar samningar voru 481 talsins. Alls mældist 31% samdráttur á milli ára á öðrum ársfjórðungi á höfuðborgarsvæðinu, en 0,5% aukning utan þess.

14. júlí 2020  |  Hagfræðideild

Samantekt

Samkvæmt upplýsingum Þjóðskrár var 355 kaupsamningum um íbúðarhúsnæði þinglýst á höfuðborgarsvæðinu í júní og voru þeir 26% færri en í júní fyrir ári síðan. Í öllum sveitarfélögum höfuðborgarsvæðisins mældist samdráttur, nema í Mosfellsbæ og á Seltjarnarnesi þar sem mældist lítilleg aukning. Maímánuður var nokkuð líflegur á íbúðamarkaði þar sem þinglýsingar voru mun fleiri en í apríl þegar samkomubann stóð sem hæst og sömuleiðis mældist nokkuð skörp hækkun á íbúðaverði milli mánaða. Vísbendingar voru því um að líf væri að færast í íbúðamarkaðinn. Tölur júnímánaðar benda til þess að staðan sé nokkuð róleg enn sem komið er á höfuðborgarsvæðinu, þó viðskipti séu fleiri en þegar samkomubann stóð sem hæst.




Meðan samdráttur mælist á höfuðborgarsvæðinu, mælist aukning víða utan þess. Á Akureyri, Akranesi og á Árborgarsvæðinu var alls staðar fleiri kaupsamningum þinglýst á öðrum ársfjórðungi í ár samanborið við sama fjórðung í fyrra. Mest var aukningin á Akranesi þar sem 57% fleiri kaupsamningum var þinglýst, á Akureyri mældist aukning upp á 18%, og 12% á Árborgarsvæðinu.

Það kemur örlítið á óvart að sjá svona mikla aukningu á tímum þar sem kreppir að, og samningum fækkar á höfuðborgarsvæðinu, en þessi niðurstaða gæti verið til marks um það að fólk hafi í auknum mæli leitað út fyrir höfuðborgarsvæðið í leit að húsnæði. Aukningin utan höfuðborgarsvæðis veldur því að samdrátturinn á öðrum ársfjórðungi er ekki jafn mikill og búast hefði mátt við yfir landið allt, þar sem í kaupsamningum fjölgar um 0,5% utan höfuðborgarsvæðis, en fækkar 31% innan þess. Það ber þó að hafa í huga að mislangur biðtími getur verið eftir skjölum úr þinglýsingu eftir sýslumannsembættum, sem kann einnig að vera skýring á ólíkri þróun eftir landssvæðum.

Lesa Hagsjána í heild

Hagsjá: Kaupsamningum á höfuðborgarsvæðinu fækkar en fjölgar víða annars staðar (PDF)

Póstlistar

Þú getur fengið reglulegar tilkynningar um nýtt útgáfuefni Landsbankans með því að skrá þig á póstlista. Bankinn gefur út fjölbreytt efni um fjármál, efnahagsmál, eignastýringu og ýmislegt fleira.

Skráðu þig á póstlista

Fyrirvari

Innihald og form þeirra greininga sem birtast hér er unnið af starfsmönnum Hagfræðideildar Landsbankans hf. og byggist á aðgengilegum opinberum upplýsingum á þeim tíma sem þær voru unnar. Mat á þeim upplýsingum endurspeglar skoðanir starfsmanna Hagfræðideildar Landsbankans á þeim degi þegar þær voru dagsettar, en þær geta breyst án fyrirvara.

5850a07c-403d-11e5-af9c-0050568800ef

No filter applied

Tengdar greinar