Fjárhagur

Góð ráð um kortanotkun í útlöndum

Að mörgu er að hyggja áður en lagt er af stað í ferðalag til útlanda. Hér má sjá lista yfir atriði sem gott er að hafa í huga um kortanotkun áður en lagt er af stað í ferðalagið.

15. maí 2018  |  Gyða Gunnarsdóttir

Gyða Gunnarsdóttir


Gyða Gunnarsdóttir, greiðslukortasérfræðingur hjá Landsbankanum.


Rétt áður en skellt er í lás heima renna flestir í huganum yfir hvort "allt" sé örugglega með. Gyða Gunnarsdóttir, greiðslukortasérfræðingur hjá Landsbankanum, segir að mikilvægasta spurningin sem hún spyrji sjálfa sig sé þessi: "Er ég með vegabréfið og Visakortið?" Ef svo er þá eru henni allir vegir færir og annað reddast!

"Í ferðalögum til útlanda tek ég alltaf með mér bæði kredit- og debetkort og það á ekki síst við þegar farið er til landa þar sem minni hefð er fyrir kortanotkun. Debetkortið nota ég til að taka reiðufé út úr hraðbönkum, því þá er lægri  úttektarþóknun innheimt  en af kreditkortinu. Ég nota hins vegar kreditkortið í verslunum því sérstakt álag er lagt ofan á erlendar debetkortafærslur í verslunum.

Ég mæli líka yfirleitt með því að fólk taki með sér gjaldeyri en það er misjafnt eftir löndum hversu mikið er hæfilegt. Ef þú ert viss um að komast auðveldlega í hraðbanka er sennilega ekki þörf á að vera með mikinn gjaldeyri meðferðis og yfirleitt er hvort sem er öruggara og þægilegra að nota kort í posa sem greiðslu. Það þarf að hafa í huga að ef peningarnir glatast eða þeim er stolið, þá fást engar bætur. Ef þú hins vegar týnir kortunum þá er hægt að loka þeim og verja sig þar með fyrir tjóni," segir Gyða.

Aðstæður geta verið mjög misjafnar eftir löndum og ef farið er á framandi slóðir þarf að kynna sér aðstæður þar sérstaklega. Ef þú ert á leið til Rússlands í sumar getur verið gott að kynna sér upplýsingar um ferðalög til Rússlands, sem íslenska utanríkisráðuneytið tók saman.

Hér fyrir neðan er listi yfir atriði sem gott er að hafa í huga um kortanotkun áður en lagt er af stað í ferðalag til útlanda.

Heimildir og ráðstöfun

Er ég með næga úttektarheimild á kreditkortinu fyrir ferðina? Þarf ég að passa að greiða kortareikninginn meðan ég er erlendis eða er hann skuldfærður sjálfkrafa? Ekki gleyma að mörg hótel og ekki síst bílaleigur gera kröfu um að gestir og leigutakar leggi fram kreditkort sem tryggingu og mega taka frá heimild og halda henni meðan á ferð stendur.

Í appi og netbanka Landsbankans er mjög auðvelt að fylgjast með kortafærslum og upphæðin sem tilgreind er í "ráðstöfun" er sú sem hægt er að nota á hverjum tíma.

PIN-ið á minnið

Þetta er auðvitað algjört grundvallaratriði. Við komumst hvorki lönd né strönd nema að muna rétt PIN fyrir það kort sem verið er að nota. Í Landsbankaappinu og netbankanum er hvenær sem er hægt að fletta upp PIN-inu ef við erum í vafa.

Passaðu upp á PIN-ið

Þessi góða vísa verður aldrei of oft kveðin. Skúrkar stunda það að fylgjast með þegar fólk slær inn PIN-númer, stela í kjölfarið kortunum og versla svo eins mikið og hægt er, áður en korthafi verður þess var eða nær að tilkynna stuldinn. Á þeirri stundu er jafnvel búið að fullnýta heimildina og korthafi situr eftir með sárt ennið og oft á tíðum tjónið, þar sem færslurnar voru staðfestar með PIN.

Nota snertilausa virkni

Ég mæli með að fólk nýti sér snertilausu virkni kortanna til greiðslu þegar því verður við komið. Þar með fækkar skiptunum sem einhver getur fylgst með þér slá inn PIN.

Ekki slá inn PIN við endurgreiðslu

Aldrei skal slá inn PIN þegar söluaðili ætlar að endurgreiða þér með posa eða leggja inn kortið þitt. Nánar er fjallað um öryggi í netverslun á Umræðunni.

Læst PIN

Ef rangt PIN er slegið of oft inn, þá læsist það. Ef PIN læsist þegar korthafi er staddur í útlöndum, þá er í flestum tilvikum hægt að aflæsa því með því að fara í hraðbanka og taka út reiðufé. Gott er að miða við lágmarks úttektarfjárhæð að virði 10-15 þúsund íslenskar krónur.


Hraðbanki

Reiðufjárúttektir

Reiðufjárúttektir erlendis eru takmarkaðar, bæði tími milli úttekta og hámarksupphæðir á sólarhring. Erlendis þurfa að lágmarki þrjár klukkustundir að líða á milli úttekta og er það hluti af áhættuvernd kortanna.

Hraðbankaúttektir og gjaldkeraúttektir eru settar undir sama hatt þannig að þær reiknast saman inn í hámörk dagsins. Gott er að kynna sér reglur bankans svo minni hætta sé á að lenda í óþægindum.

Staðsetning hraðbanka

Ef mögulegt er, þá er best að velja hraðbanka sem staðsettir eru á öruggum stöðum, s.s. við banka eða inni í banka, en forðast frekar hraðbanka sem standa stakir.

Kostnaður

Af reiðufjárúttektum erlendis á kreditkort greiðist þóknun samkvæmt verðskrá bankans. Nú er hún 2,75% ofan á úttektarfjárhæð, þó að lágmarki 800 krónur. Upplýsingar um Visa-gengið má finna á vef bankans.

Erlend úttekt í íslenskum krónum

Fólk sem er á ferðalögum erlendis er oft spurt hvort það vilji greiða með greiðslukorti í sínum eigin gjaldmiðli, í stað gjaldmiðils viðkomandi lands. Alla jafna er dýrara fyrir korthafa að samþykkja erlendu úttektina í íslenskum krónum. Ég fjallaði um þetta í pistli hér á Fjárhag árið 2015.

Takmörkun snertilausra færslna

Takmörkun snertilausra færslna er sú sama og á innlendum færslum nema að í viðkomandi landi séu strangari reglur, þá gilda þær.

Tryggingavernd kreditkorta

Mismunandi er hversu víðtæk tryggingavernd fylgir kreditkortunum og fyrir brottför er gott að renna yfir skilmála tryggingafélagsins VÍS, sem tryggir korthafa Landsbankans. Korthafar sem eru með innifaldar bílaleigutryggingar í kortunum sínum ættu að kynna sér vel yfir hvað þær ná og hvaða lönd eru undanþegin þeim tryggingum. Vert er að benda sérstaklega á núna, þar sem Íslendingar munu væntanlega flykkjast á HM í knattspyrnu, að skv. skilmálum í gildi nú í apríl 2018, þá gilda bílaleigutryggingarnar ekki í Rússlandi.

Eins má benda á að það er vel þess virði að lesa yfir góð ferðaráð sem VÍS hefur tekið saman á heimasíðu sinni.

Kortaþjónusta allan sólarhringinn

Korthafar Landsbankans njóta sólarhringsþjónustu. Eftir lokun Þjónustuvers Landsbankans tekur neyðarþjónusta Valitor við í síma 525-2200.

Helsta aðstoð og neyðarþjónusta sem korthafar sækja er:

  1. Tilkynningar um glatað/stolið debet- og kreditkort.
  2. SOS viðlaga- og neyðarþjónusta vegna alvarlegra slysa og veikinda.
  3. Neyðarkort sem mögulegt er að senda með DHL hraðflutningum.
  4. Neyðarfé í gegnum Western Union skv. verðskrá Valitor.

Hafðu samband

Auðvitað getur ýmislegt komið upp í kortaviðskiptum og skýringarnar ekki alltaf augljósar okkur sem stöndum kindarleg fyrir framan söluaðila þegar kortinu er hafnað. Viðskiptavinir Landsbankans ættu ekki að hika við að hafa samband ef upp koma óþægindi við notkun kortanna, því oft er hægt að kippa hlutum fljótt og vel í liðinn.

Hægt er að hafa samband við Þjónustuver Landsbankans í s. 410 4000, með því að senda tölvupóst í netfangið info@landsbankinn.is eða með því að senda okkur skilaboð á Facebook.

Höfundur er greiðslukortasérfræðingur hjá Landsbankanum.

Fyrirvari

Þær upplýsingar sem er að finna á þessu vefsvæði eru unnar af starfsmönnum Landsbankans og eru þær eingöngu veittar í upplýsinga- og fræðsluskyni. Efninu er ekki ætlað að vera ráðgefandi um fjármál einstaklinga en slík ráðgjöf er einstaklingsmiðuð og veitt hverjum og einum af þjónustufulltrúum, fjármálaráðgjöfum eða öðrum sérfræðingum Landsbankans.

Þær upplýsingar sem fram koma á þessu fjármálabloggi endurspegla á engan hátt skoðanir eða mat Landsbankans heldur einungis höfunda efnisins. Landsbankinn á allan höfundarétt að því efni sem er að finna á vefsvæðinu, nema annað sé tekið fram. Hvers konar misnotkun á efninu er með öllu óheimil.

5850a07c-403d-11e5-af9c-0050568800ef

No filter applied

Tengdar greinar