Fjárhagur

Hvenær gildir vísitala neysluverðs til verðtryggingar?

Vísitala neysluverðs reiknast ekki strax til verðtryggingar. Í þessum pistli er fjallað um hvernig og hvenær vísitalan er tekin með í reikninginn.

24. apríl 2020  |  Sigurjón Gunnarsson

Í lok hvers mánaðar birtir Hagstofan vísitölu neysluverðs miðað við verðlag í þeim mánuði. Verðlagið er skoðað um miðjan mánuðinn en vísitalan birt í lok mánaðar.

Það hefur vafist fyrir mörgum að á svipuðum tíma og Hagstofan tilkynnir um nýja vísitölu og breytingu frá fyrri mánuði er allt önnur breyting sem á sér stað, t.d. á verðtryggðum reikningum. Dæmi um þetta eru mánaðamótin febrúar og mars 2020. Í lok febrúar voru neikvæðar verðbætur á verðtryggðum reikningum en rétt fyrir mánaðamótin kom tilkynning um að vísitala neysluverðs hefði hækkað um 0,92%. Skýringin á þessu er sú að vísitalan sem var kunngjörð í lok febrúar gildir til verðtryggingar í apríl, eða eins og segir í fréttatilkynningunni frá Hagstofunni: „Vísitala neysluverðs samkvæmt útreikningi í febrúar 2020, sem er 474,1 stig, gildir til verðtryggingar í apríl 2020“.

Verðtryggður reikningur sem var með innstæðu upp á 1.000.000 krónur eftir verðbætur janúarmánaðar ber neikvæðar verðbætur að fjárhæð 7.395 krónur í lok febrúar og lækkar innstæða því í 992.605 krónur.

Í lok mars ber viðkomandi reikningur hins vegar jákvæðar verðbætur sem samsvara þessare 0,92% hækkun, sbr. ofangreint, eða 9.095 krónur. Staðan á reikningnum er því orðin 1.001.690 krónur.

Einnig hafa margir ruglast þegar leitað er eftir vísitölu á vef Hagstofunnar og sjá t.d. að grunnvísitala skuldabréfs er ekki sú sama og þar kemur fram. Skýringin er sú að vísitala miðað við verðlag í t.d. janúar gildir til verðtryggingar í mars. Það er nauðsynlegt að hafa á hreinu hvort verið sé að tala um vísitölu neysluverðs til verðtryggingar eða hvort miða eigi við verðlag í mánuði. Skýringin á þessu er sú að vísitala vikomandi mánaðar liggur ekki fyrir fyrr en í lok mánaðar. Þegar hún er birt er rúmur mánuður þar til hún tekur gildi til verðtryggingar.

 

Sigurjón Gunnarsson, sérfræðingur í Fjárstýringu Landsbankans

Fyrirvari

Þær upplýsingar sem er að finna á þessu vefsvæði eru unnar af starfsmönnum Landsbankans og eru þær eingöngu veittar í upplýsinga- og fræðsluskyni. Efninu er ekki ætlað að vera ráðgefandi um fjármál einstaklinga en slík ráðgjöf er einstaklingsmiðuð og veitt hverjum og einum af þjónustufulltrúum, fjármálaráðgjöfum eða öðrum sérfræðingum Landsbankans.

Þær upplýsingar sem fram koma á þessu fjármálabloggi endurspegla á engan hátt skoðanir eða mat Landsbankans heldur einungis höfunda efnisins. Landsbankinn á allan höfundarétt að því efni sem er að finna á vefsvæðinu, nema annað sé tekið fram. Hvers konar misnotkun á efninu er með öllu óheimil.

5850a07d-403d-11e5-af9c-0050568800ef

No filter applied

Tengdar greinar