Fjárhagur

Hvað kostar að taka skammtímalán?

Óvænt útgjöld eða tekjufall geta valdið því að stundum þarf að taka lán til skamms tíma og með litlum fyrirvara. Ýmis skammtímalán eru í boði og það borgar sig að kanna hvar hægt er að fá bestu kjörin.

9. júní 2020  |  Sigurjón Gunnarsson

 

Sigurjón Gunnarsson, sérfræðingur í Fjárstýringu Landsbankans


ÁHK segir hvað lánin kosta í raun og veru

Til að bera saman kjör á skammtímalánum er ekki nóg að horfa á vaxtaprósentuna eina og sér. Besti samanburðurinn fæst með því að skoða árlega hlutfallstölu kostnaðar (ÁHK) sem felur í sér allan kostnað vegna lántökunnar (s.s. lántökugjald, seðilgjald og greiðslugjald). Heildarkostnaðurinn við lánið er síðan umreiknaður í ársávöxtun (eða ársvexti). Slíkan samanburð er einfalt að gera á vefnum Aurbjörg.is, en reiknivél Aurbjargar reiknar ÁHK skammtímalána og auðveldar samanburð á ólíkum kostum.

ÁHK er í raun verðmiðinn á láni og segir til um hversu dýrt er að taka það. Mjög miklu getur munað á ólíkum lánum og það borgar sig að gefa sér tíma til að skoða hvað mismunandi lán kosta.

Samanburður Aurbjargar tekur til neytendalána sem hægt er að fá með rafrænu umsóknarferli. Aukalán Landsbankans eru í þeim flokki en hægt er að fá Aukalán í Landsbankaappinu með skjótum og einföldum hætti. Í appinu sérðu strax hvað þér býðst hátt lán og á hvaða kjörum.

Yfirdráttarlán vs. skammtímalán

Yfirdráttarlán eru ekki inni í samanburði Aurbjargar. Yfirdráttarlán til einstaklinga bera yfirleitt ekki neinn kostnað annan en vextina sem eru reiknaðir mánaðalega og því er ÁHK aðeins lítillega hærri en vextirnir sjálfir.

Skammtímalán eru yfirleitt innheimt með mánaðarlegum greiðsluseðlum. Það er á hinn bóginn undir lántakanum sjálfum komið hversu hratt hann greiðir yfirdráttinn niður. Í netbanka Landsbankans og í Landsbankaappinu er hægt að sækja um yfirdráttarheimild, hækka, lækka, framlengja og segja upp heimildinni. Helstu kostirnir við yfirdráttarlán eru að þau eru sveigjanlegri og án annars kostnaðar en vaxta. Hægt er að greiða inn á yfirdráttinn hvenær sem er. Peningur sem staldrar stutt við á innlánsreikningum fer líka til að lækka yfirdráttinn tímabundið og þar með lækkar vaxtakostnaður yfirdráttarlánsins.

Getur verið gott að sameina skammtímaskuldir í eitt lán

Það er þó vissulega dýrt að vera með yfirdrátt, sérstaklega ef lántakinn gætir ekki að því að greiða hann reglulega niður, líkt og hann hefði tekið lán með reglulegum afborgunum. Það er misjafnt hversu agaðir lántakar eru við niðurgreiðslu yfirdráttar. Ef fólk greiðir ekki reglulega inn á yfirdráttinn getur verið betra að taka annars konar lán – t.d. skammtímalán – með reglulegum gjalddögum.

Það getur því verið góður kostur að taka t.d. Aukalán Landsbankans og nýta það til að greiða upp yfirdráttinn. Aukalán er skammtímalán án veðs sem endurgreiðist með jöfnum greiðslum. Boðið er upp á lán frá þremur mánuðum til fimm ára. Vextir ráðast af lánshæfi lántaka og ef lánið er tekið í Landsbankaappinu leggst aðeins við lægsta tilkynninga- og greiðslugjald á hverjum gjalddaga,sem er nú 120 krónur. Vextir geta verið hagstæðari en á yfirdrættinum og ÁHK er svipuð. Einnig getur verið gott að sameina allar skammtímaskuldir í eitt Aukalán og greiða það reglulega niður. Það má greiða inn á Aukalán eða greiða það upp hvenær sem er, án kostnaðar.

Það er að mörgu að huga og sem fyrr segir mælum við með að bera saman kjörin áður en skammtímalán er tekið, líkt og auðvelt er að gera á vef Aurbjargar.

Fyrirvari

Þær upplýsingar sem er að finna á þessu vefsvæði eru unnar af starfsmönnum Landsbankans og eru þær eingöngu veittar í upplýsinga- og fræðsluskyni. Efninu er ekki ætlað að vera ráðgefandi um fjármál einstaklinga en slík ráðgjöf er einstaklingsmiðuð og veitt hverjum og einum af þjónustufulltrúum, fjármálaráðgjöfum eða öðrum sérfræðingum Landsbankans.

Þær upplýsingar sem fram koma á þessu fjármálabloggi endurspegla á engan hátt skoðanir eða mat Landsbankans heldur einungis höfunda efnisins. Landsbankinn á allan höfundarétt að því efni sem er að finna á vefsvæðinu, nema annað sé tekið fram. Hvers konar misnotkun á efninu er með öllu óheimil.

No filter applied

Tengdar greinar