Á hverju ári veitir Landsbankinn námsstyrki. Styrkirnir eru fimmtán talsins og nemur heildarupphæð þeirra 6.000.000 króna. Þeim er ætlað að auðvelda efnilegum námsmönnum lífið og renna til alls kyns námsleiða, enda er nám nánast jafn fjölbreytt og fólkið sem stundar það.

9. júlí 2020 | Landsbankinn

Námsstyrkirnir eru veittir úr samfélagssjóði bankans og eru veittir í fimm flokkum: til framhaldsskólanema, iðn- og verknema, háskólanema, háskólanema í framhaldsnámi og listnema. Meðal þeirra sem fengu styrki í ár eru sellóleikarinn Ragnar Jónsson, bifvélavirkinn Guðrún Svava Gomez og doktorsneminn Bríet Bjarkadóttir.


Kaupir alltaf flugsæti fyrir sellóið sitt

Ragnar Jónsson er 26 ára gamall sellóleikari sem stundar tónlistarnám í Þýskalandi. Hann er þó enn búsettur á Íslandi út af kórónuveirunni Covid-19 en sér fram á að ná að flytja í lok sumars. Hann segir styrkinn frá Landsbankanum koma að góðum notum vegna þeirra tíðu ferða sem hann og sellóið hans þurfa að fara á milli landa.

„Styrkurinn mun nýtast mér við að koma mér aftur af stað eftir allt þetta heimsfaraldurstímabil. Það hefur verið heldur lítið að gera hjá mér,“ segir hann. „Það er líka kostnaðarsamt að ferðast með selló á milli landa. Ég þarf alltaf að kaupa flugsæti fyrir sellóið líka, því hljóðfærið er það dýrt að það þarf að ferðast með það á öruggan hátt.“

Ragnar hóf nám í sellóleik aðeins fimm ára gamall og hefur það átt hug hans og hjarta síðan. „Ég ætlaði reyndar alltaf að verða kontrabassaleikari og talaði stanslaust um það. Því miður var ekki til neitt nám í kontrabassaleik fyrir fimm ára gutta. Foreldrar mínir fundu því málamiðlun og úr varð að ég fór að læra á selló,“ segir hann. Síðan þá hefur hann verið í tónlistarnámi sem hefur nú leitt hann til Mannheim í Þýskalandi. „Það er reyndar pínu fyndið að ég hef aldrei komið til Mannheim, þrátt fyrir að vera í námi þar. Málið er að ég er að elta kennarann minn sem tók við sellóprófessorsstöðu þar. Hann átti að byrja að kenna í upphafi sumarannar í byrjun apríl, en vegna veirunnar hefur námið verið fjarnám.“ Ragnar hlakkar mikið til að flytja loksins í haust.


Úr listnámi í bifvélavirkjun

Guðrún Svava Gomez er 25 ára gömul og útskrifaðist af listnámsbraut Fjölbrautarskólans í Breiðholti árið 2015. Í framhaldi stefndi hún á nám í Listaháskólanum en tók algjöra u-beygju sumarið eftir útskrift. Nú stundar hún iðnmeistaranám í bifvélavirkjun.

„Ég byrjaði í meistaraskólanum núna í janúar og er mjög þakklát fyrir námsstyrkinn frá Landsbankanum. Hann mun koma sér vel og hjálpa mér að ná að ljúka náminu mínu,“ segir Guðrún, en gangi allt að óskum öðlast hún meistararéttindi á næsta ári.

Guðrún fékk algjöra bíladellu sumarið 2015. Hún átti bíl af gerðinni VW Golf og ákvað að gera hann upp. „Ég ákvað að prófa mig bara áfram með bílinn. Spreyjaði felgurnar, afturljósin, pússaði og grunnaði og lagaði ryðbletti og bara fann hvað mér fannst þetta gaman. Ég tók því ákvörðun að skrá mig í bifvélavirkjun með litla sem enga þekkingu á iðngreininni,“ segir hún en við útskrift hlaut hún fjölda verðlauna og viðurkenningu fyrir framúrskarandi árangur. „Mitt ráð til að ná góðum árangri er að sækja og stunda nám þar sem áhuginn liggur og hlusta á hjartað, ekki aðra,“ segir hún.


Lærir nýja frjóvgunartækni við háskólann í Oxford

Bríet Bjarkadóttir er 28 ára doktorsnemi í læknavísindum við Oxford-háskóla. Hún sérhæfir sig í frjósemi og tæknifrjóvgunum og er á lokaári í náminu. Hún segir námsstyrkinn koma sér vel því doktorsnám sé aðeins launað í þrjú ár, en oft þurfi nokkra mánuði til viðbótar til að ganga frá lokaritgerðinni og verja hana. Styrkurinn hjálpi henni að brúa bilið milli náms og vinnu.

„Ætli ég hafi ekki farið að hafa áhuga á læknavísindum í menntaskóla. Þegar ég var síðan í grunnnámi lærði ég um frjósemi og æxlunarlíffræði og þá vissi ég hvert ég vildi stefna í náminu,“ segir hún aðspurð hvernig hún endaði í þessu námi. „Eftir BS-námið ákvað ég að ég vildi starfa við frjósemi og tæknifrjóvgun og fór í meistaranám í fósturvísafræði í Oxford-háskóla. Í náminu kynntist ég betur sviði frjósemi og þá sérstaklega hvernig varðveita megi frjósemi hjá þeim sem þurfa að ganga í gegnum krabbameinsmeðferð. Í kjölfarið ákvað ég að fara í doktorsnám hjá leiðbeinanda sem ég hafði kynnst í meistaranáminu,“ segir hún.

Bríet segir námið hafa aukið skilning sinn á sviði frjóseminnar til muna og gera henni kleift að taka þátt í og jafnvel leiða rannsóknarverkefni á þessu sviði. „Eftir námið er stefnan að starfa áfram við tæknifrjóvgun og taka þátt í rannsóknarverkefnum. Ég hef einnig fengið þjálfun í tækni sem felur í sér að frysta eggjastokkavef til að varðveita frjósemi, en sú tækni er sem stendur ekki til á Íslandi,“ segir hún.


Sérstök dómnefnd skipuð af þremur fagaðilum og einum sérfræðingi bankans fer yfir umsóknir um styrkina og er umsóknarferlið gagnsætt og faglegt.

Dómnefndin leitast við að velja framúrskarandi, metnaðarfulla námsmenn með skýra framtíðarsýn. Einnig er litið til atriða eins og rannsókna og greinarskrifa, meðmæla, sjálfboðastarfa, afreka í íþróttum og þátttöku í félagsstarfi svo eitthvað sé nefnt - allt sem talið er auðga íslenskt samfélag til framtíðar.

Landsbankinn óskar styrkhöfum ársins til hamingju og hvetur alla námsmenn til að sækja um að ári.